నా తెగులు...!: బంగారు పువ్వులు బతుకమ్మయని పేర్చి ..

30, మార్చి 2010, మంగళవారం

బంగారు పువ్వులు బతుకమ్మయని పేర్చి ..

హెచ్.బి.ఒ లో ఏమొస్తుందోనన్న బెంగ తో రిమోట్ తో సెర్చుతుండగా "ఒక్కొక్క ఎలిగె పండూ గౌరమ్మా...దూరాన దోరపండూ గౌరమ్మా.."అంటూ ఒకానొక చానల్లో
బతుకమ్మ పాటొస్తుంటే పానం కాంతి వేగంతో నా పుట్టింట్టికి పారిపోయింది.
ఫ్లాష్ బాక్ లో..,మా ఊళ్ళో పెత్తరమాస.. వీది వీదంతా తంగేడు,బంతి.చామంతి ఇంకా రక రకాల పూలతో,పండ్లతో మొజంజాహి మార్కెట్లా ఉండేది..
ఆ పూలతో అమ్మలక్కలు బతుకమ్మలు పేరుస్తుంటే, మా నాయిన మాత్రం బయట చాపేసుకొని మిద్దెరాములు ఒగ్గుకత వింటూ రంగురంగుల దారాలతో,రంగుదారాలతో మధ్య మధ్యలో తంగేడు,జిల్లేడు,బంతి,ఉప్పు పువ్వుతో ఈఫీల్ టవర్ ఎత్తంత భలే కళాత్మకమైన బతుకమ్మను పేర్చి మా అమ్మకిచ్చేవాడు..
పొద్దుగూకాక గంజి పెట్టీ ఇస్త్రీ చేసిన పట్టు బట్టల్తో లేడీసు గౌరవంగా పట్టుకొచ్చే గౌరమ్మలను చూస్తుంటే కలిగే ఆనందం

చెప్పనలవి కాకుండా ఉండేది..
సరిగ్గా ఆరు,ఆరున్నరకు "బంగారు పువ్వులు బతుకమ్మయని పేర్చి మంగలంబున నిన్ను మధ్యనా నిల్పియు..రంగు గుమ్మడి పువ్వులూ గౌరమ్మ రాశిగా నర్పింతురూ..."అంటూ బతుకమ్మగీతాలు కోరస్ గా మొదలయ్యేవి..... మా అమ్మచేసిన మల్లిద ముద్దలు తింటూ
ఆ పూల బతుకమ్మల మధ్యలో రంగుపూల దారాల ఎత్తైన ఈఫీల్ టవర్ ను చూస్తుంటె అచ్చం మా నాయినను చూస్తున్నట్టే ఉండేది..
ఠీవీగా..దర్పంగా..స్పెషల్ స్పెషల్ గా .....

[మా నాయిన గుర్తొచ్చిన ప్రతిసారి ఏదో రాయాలి,ఏదో గీయాలి అనిపిస్తుంటుంది..నాకేమో Dyslexia [అచ్చరాలను గుర్తు పట్టకపోవడం]జబ్బాయె..
మార్చి ముప్పైయ్యో,ముప్పై ఒకటో మా నాయిన పుట్టిన రోజని లీలగా గుర్తు........

కనీసం ఈ రోజన్నా విస్మరణకు బదులు స్మరణ చేద్దామని..